वार्षिक समीक्षा तथा आ.ब. २०८१/०८२ को बजेट सुझाव संकलन कार्यक्रम सम्पन्न

भक्तपुर जिल्ला बचत तथा ऋण सहकारी संघ लि. को वार्षिक समीक्षा तथा आ.ब. २०८१/०८२ को बजेट सुझाव संकलन कार्यक्रम २०८१ श्रावण १७ गते बिहीबार के.भी लञ्च, कमलविनायकमा सम्पन्न भयो । उक्त कार्यक्रमलाई सम्बोधन गर्दै सोही संघका अध्यक्ष कृष्णगोविन्द लाखाजुले हाम्रो यस संघले अनुगमनलाई प्राथमिकता दिने र समय अनुकुल सामाजिक उत्तरदायित्वमा ध्यान दिएर सदस्य संस्थालाई आर्थिक पक्षमा सुदृढ बनाउने विचार व्यक्त गर्नूभयो । उहाँले सहकारी संस्थाहरु बलियो भए भने सहकारी संघ समेत बलियो हुने भएकोले सहकारी संस्थाहरुको चौतर्फी विकासमा हाम्रो यो संघ निरन्तर प्रयासरत रहेको बताउनुभयो । त्यस संघले आ.ब.२०८०/०८१ मा तय गरेको कार्यक्रम तथा बजेटको समीक्षा गर्दै उहाँले हाम्रो यो संघले आ.व.२०८०/०८१ तय गरेको कार्यक्रम सफलतापूर्वक सम्पन्न भएको भन्दै प्रशन्नता व्यक्त गर्नुभयो ।
कार्यक्रममा स्वागत मन्तव्य व्यक्त गर्दै सो संघका उपाध्यक्ष हरि बल्लले समीक्षाको महत्वबारे प्रकाश पार्दै नीतिमा चल्दै आएका सहकारी संघ र संस्थाहरुमा समस्या नरहेको बताउनुभयो । उहाँले हालको अवस्था समुदायमा आधारित सहकारी संस्थाको लागि अवसर रुपमा रहेको विचार व्यक्त गर्नुभयो । कार्यक्रममा त्यसै संघका सचिव जगनाथ प्रजापतीले उक्त संघको आ.व. २०८०/०८१ को कार्यक्रम तथा तालिम प्रगतिको बारेमा प्रस्तुति गर्नुभयो । उहाँले कार्यक्रम समीक्षा अन्तर्गत सहकारी अभियानका कार्यक्रम, सदस्य, सञ्चालक र कर्मचारीहरुको क्षमता विकासका तालिमहरु र सहकारी संघले प्रदान गर्ने सेवाहरुको बारे प्रगति प्रतिवेदन पेश गर्दै यस संघका ११ वटा सदस्य संस्थाहरुमा अनुगमन विभिन्न उप-समितिहरुद्वारा भएको जानकारी दिनुभयो । उहाँले बागमती प्रदेश बचत तथा ऋण सहकारी संघ लि.को पाँचौं स्थापना दिवसबाट उत्कृष्ट जिल्ला बचत संघको पुरस्कारका लागि हाम्रो यो संघको नाम घोषणा भएको बताउनुभयो ।
कार्यक्रममा उक्त संघका कोषाध्यक्ष कान्छाभक्त घजुले सो संघको आ.ब.२०८०/०८१ को आर्थिक समीक्षा गर्दै कूल पूँजी तथा दायित्वमा गत वर्षको तुलनामा ५८ प्रतिशतले बृद्धि भई रु.३ अर्ब ५२ करोड पु-याउन सफल भएको र जुन अनुमानमा १४४ प्रतिशतले प्रगति हासिल भएको बताउनुभयो । उहाँले आम्दानी र खर्चमा ११० प्रतिशत लक्ष्य हासिल भई लेखा परीक्षण पूर्व रु.५ करोड ६६ लाख आय भएको सो संघको प्रतिवेदन पेश गर्नुभयो ।
कार्यक्रममा सो संघका लेखा सुपरीवेक्षण समितिका संयोजक बालमुकुन्द उपाध्यायले बैंक वित्तीय संस्थामा वित्तीय लगानी गरेर संघ दिगो नहुने भन्दै सदस्यता बृद्धि र ऋण लगानी बढाउनमा जोड दिनुपर्ने बताउनुभयो । उहाँले संघको अग्रिम व्याजकर दाखिला रु.७ करोड ६८ लाख भन्दा बढी रहेकोले यो रकम फिर्ता वा घटाउन संघले विशेष योजना ल्याउनुपर्नेमा जोड दिनुभयो ।
कार्यक्रममा सोही संघका व्यस्थापक बालकृष्ण धोजुले त्यस संघको आ.व.२०८१/०८२ को कार्यक्रम, योजना तथा बजेट प्रस्तुत गर्नुभयो । उहाँले संघको सदस्य सक्षमता विकास, सञ्चालक र कर्मचारीको क्षमता विकास, संस्थागत विकास र अनुगमनका लागि योजना तथा बजेट पेश गर्दै ऋण लगानीलाई प्रोत्साहन गरी अग्रिम व्याजकर दाखिला घटाउने योजना समेत राख्नुभयो ।

सो वार्षिक समीक्षा तथा आ.व.२०८१/०८२ को बजेट सुझाव संकलन कार्यक्रममा सोही संघका सञ्चालक समिति, लेखा सुपरीक्षण समिति र उप-समितिहरुका पदाधिकारी तथा सदस्यहरु र कर्मचारीहरु गरी ४४ जनाको सहभागिता रहेको थियो ।